Nú er komið að seinni bylgjunni eða þriðju bylgjunni af Covid eða hvað sem hún kallast? Við kjósum að kalla hana seinni bylgjuna sem er hugtak sem margir kannast við úr boltagreinum. 

Bylgjan hófst fyrr á höfuðborgarsvæðinu og félögin þar hafa þurft að eiga við hana  lengur en landsbyggðin - sem tekur á móti henni af fullum krafti núna. 

Liðsheild er annað hugtak sem iðkendur læra í gegnum öflugt íþróttastarf en liðsheild er hægt að skilgreina sem hóp með sameiginlegan draum/markmið sem er tilbúinn að gera allt sem þarf til að ná því marki. Það á vel við þessa dagana - við þurfum á því að halda að allir Íslendingar sýni sterka og öfluga liðsheild í þessari farsóttarbaráttu.


Við höfum bætt við mikilvægum eiginleika í stjórnandasýn Sportabler að geta flutt út skjöl með upplýsingum um flokka eða heilu félögin sem er hægt að afhenda viðbragðsaðilum ef þörf er á.

Það hefur nú þegar sannað gildi sitt er smit kom upp í félagi og að geta sótt þennan lista með öllum nauðsynlegum upplýsingum og afhent smitrakningarteyminu á augabragði flýtti mikið fyrir allri vinnu.


Í fyrstu bylgjunni í vor var stórkostlegt að sjá metnaðinn og eljusemina í þjálfurum og iðkendum þegar hefðbundna starfið lá niðri. Notkun Sportabler sló öll met, heimaæfingar, áskoranir, markmiðasetning o. fl. fór fram og til baka milli þjálfara og iðkenda. 

Þegar starfið fór svo aftur af stað voru félögin snögg að skipuleggja starfið upp á nýtt og ná til allra en meðalnotandi fer tæplega tvisvar á dag inn í appið og það sást vel sl. mánuð þegar félög þurftu að hópaskipta meira, fella niður viðburði eða því miður - upplýsa um smit og rekja hvaða meðlimir höfðu verið saman á æfingum.

Nú reynir á seigluna hjá okkur öllum. Í íþróttum gefst maður ekki upp þó á móti blási - veiran er með yfirhöndina í leiknum í augnablikinu en ef allir leggjast á eitt þó snúum við taflinu við og þá þarf ekki að spyrja að leikslokum.

Við minnum á leiðbeiningar um heimaæfingar hér  en við hvetjum þjálfara til að halda virku sambandi við iðkendur til að halda þeim við efnið. Það er krefjandi þegar rútínan breytist en með því að halda góðu sambandi minnka líkur stórlega á brottfalli þegar farið er af stað aftur og allir verða tilbúnir í slaginn þegar hliðin verða opnuð aftur.